Ṭarīq at-Tawḥīd - Shaikh Sāḥil ibn Sājid
Ṭarīq at-Tawḥīd
Shaikh Sāḥil ibn Sājid
(The Way to Tauheed)
Assalamu Alaikum wa Rahmatullahi wa Barakatuhu
Bismillah hir-Rahman ir-Raheem (بِسْمِ اللَّهِ الرَّحْمَٰنِ الرَّحِيمِ)
Main koi Islamic scholar nahi hoon, Mera aqeedah yeh hai ki logon ko haq ki taraf bulaun aur Tawheed ka paigham doon, jaise Nabi (ﷺ) ne kiya.
Al-Qur'an, Surah Aal-e-Imran (3:104)
"Aur tum mein se ek aisi jamaat honi chahiye jo logon ko bhalayi ki taraf bulaye, neki ka hukm de aur burai se roke. Aur yahi log falaah pane wale hain."
Agar meri is research mein koi ghalti hai ya shak hai ki yeh sahi nahi hai, toh correct kijiye.
JazakAllah Khair.
"Ya Allah! Mere qalam ko haqq aur sachai likhne ki taufeeq de. Mujhe ilm, hikmat, aur samajh de taake jo kuch likhun, woh sirf Teri raza ke liye ho. Mujhe riya, ghalat niyat, aur ghalat maloomat se bacha. Mere lafzon ko aise bana de ke woh dilon tak pahunchein aur sirf haq ki taraf bulayen. Ameen."
Mazaron Par Dua Mangna - Haq Ya Ghalat?
Subha Fajr ki namaz ke baad, mai masjid se nikal raha tha. Masjid ke kareeb ek baba ki mazaar shareef hai. Maine dekha ke kuch log, orange topi pehne hue, wahan jaa rahe the. Mujhe tajjub hua aur socha chalo dekhte hain kya ho raha hai. Jab mai andar gaya, toh dekha yeh log namaz ke turant baad mazaar par khade ho kar dua maang rahe the.
Zaahir hai yeh log Wali Allah ke liye toh dua nahi maang rahe the, balki apni personal dua kar rahe the. Magar Allah ke ghar se nikalte hi mazar par jaake dua karna, kya yeh sahi hai?
Allah ke huzoor (Iyya kana budu wa iyya kanas taaeen - Sirf Tujh se hi madad maangte hain) keh kar tum baba ki qabr par jaake madad maangne lagte ho? Yeh kya aqal ki baat hui?
Rasoolullah ﷺ ka Hukm
Nabi ﷺ ne farmaya:
"Tum Allah ke sabse zyada qareeb sajde ki haalat mai hote ho, toh us waqt dua maango."
📖 (Sahih Muslim 482)
Abhi tum masjid mai sajda karke apne Rab se madad maang rahe the, aur turant mazar par jaake kisi aur ko pukarne lage?
Kya tumhe shak hai ke Allah tumhari dua nahi sunta?
Ya tumhara aqeeda yeh hai ke namaz aur sabr se tumhe Allah ki madad nahi milti?
Quran Kya Kehta Hai?
Allah Qur'an mai farmate hain:
📖 Surah Al-Baqarah 2:45
"Aur sabr aur namaz se madad lo. Aur beshak, yeh (kaam) mushkil hai magar un logon ke liye nahi jo Allah se darne wale hain."
📖 Surah Al-Baqarah 2:153
"Aur Allah se madad maango sabr aur namaz ke zariye. Beshak Allah sabr karne walon ke saath hai."
📖 Surah Al-Ma'idah 5:35
"Aur (Allah) ke qareeb aane ka waseela talash karo."
Kya waseela ka matlab sirf Wali Allah hai? Namaz aur sabr ka bharosa nahi hai?
Jab yeh aayat pesh karte hain:
📖 Surah Fatir 35:22
"Aur jo qabron mein hain, tum unhe nahi suna sakte, magar Allah jisse chahe suna deta hai."
Tab yeh log kehte hain:
"Tum nahi suna sakte, magar Allah suna deta hai."
Magar Allah unhe kya sunata hai?
"Tumhari dua? Tumhari fariyaad?"
"Ya Khawaja, mujhe nek aulaad naseeb kar do!"
"Ya Ghous Paak, mere rizq mein barkat ata kar do!"
"Ya Mere Mursheed, mujhe yeh de do, woh de do!"
Kya Allah unhe yeh sunata hai?
Zara ghoor-o-fikr karo! Socho, dimag se!!
Agar dua Allah ki ibaadat hai, toh yeh sirf Allah ke liye honi chahiye!
"Jab bhi tu maange, to sirf Allah se maang, aur jab bhi madad maange, to sirf Allah se madad maang."
📖 Sunan Tirmidhi 2516, Musnad Ahmad 2803 – Grade: Hasan
Toh phir mazaron pe dua maangna kahan se jaiz hogaya?
📖 Surah Al-Fatiha (1:5)
"Sirf teri hi ibadat karte hain, aur sirf tujh se hi madad maangte hain!"
📖 Surah An-Nahl (16:20-21)
"Aur jinhein yeh log Allah ke siwa pukarte hain, woh kisi cheez ko bhi paida nahi kar sakte, balke woh khud paida kiye gaye hain. Woh murda hain, jinmein koi jaan nahi."
📖 Surah An-Naml (27:62)
"Kaun hai jo beqaraar ki fariyaad sunta hai jab woh usko pukarta hai, aur takleef ko door karta hai? Kya Allah ke saath koi aur Ma’bood hai?"
Ek Ahem Sawaal
Baarish aur Rizq dene ka kaam Mikael A.S. ko diya gaya hai.
Agar direct madad maangna shirk nahi hai, toh log Mikael A.S. ko kyun nahi pukarte?
"Koi nahi kehta:
Ya Mikael! Mujhe rozi de do!"
Agar Farishton se madad maangna shirk hai, toh jo qabr mai soye hain, unse madad maangna kaise jaiz ho sakta hai?
---1. "Aur (sabhi farishte) jo unke saamne hain, woh Allah ke hukum ke bagair kuch nahi karte, aur wahi (Allah) hai jo unhe jo kaam chahta hai, karwata hai."
📖 (Surah Al-Anbiya 21:27)
2. "Allah hi hai jo asmaan se pani barsata hai, aur iske zariye zameen ko uski maut ke baad zinda karta hai."
📖 (Surah Ar-Rum 30:48)
"The Guardians – Yeh farishte hain jo humein un tamam buraiyon se bachate hain jinse Allah bachana chahta hai.
Har shakhs ke liye aage aur peechay farishte muqarrar hain jo Allah ke hukum se uski hifazat karte hain."
(Qur’an 13:11)"
Haq, Sirf Allah Ka Hai!
Yeh sab sirf jahalat aur gumrahi hai. Agar tum deen ko samajhna chahte ho, toh Quran aur Sahih Hadith ki roshni mai samjho.
📖 Surah Az-Zumar 39:3
"Kya Allah hi ke liye khalis deen nahi hai? Magar jo log uske siwa auron ko apna wali banate hain, kehte hain: 'Hum inko sirf is liye pukarte hain taake yeh Allah ke qareeb le jayein.'"
Tauheed ka Rasta – Aham Nuqaat
Sirf Allah se Dua Maangni Chahiye – Namaz ke baad seedha mazar par jaake buzurgon se madad maangna ghalat hai.
Allah Ke Sabse Qareeb Sajda Hai –
Nabi ﷺ ne farmaya ke insan sajde mein sabse qareeb hota hai, toh dua us waqt maangni chahiye. (Sahih Muslim 482)
Sabr aur Namaz Se Madad Lo
Qur'an ka hukm hai ke sirf sabr aur namaz ke zariye Allah ki madad maangi jaye. (Surah Al-Baqarah 2:45, 2:153)
Qabron Wale Madad Nahi Kar Sakte
Qur'an kehta hai ke jo qabron mein hain, woh sun nahi sakte. (Surah Fatir 35:22)
Dua Bhi Ibadat Hai –
Nabi ﷺ ne farmaya ke jab bhi dua maango, sirf Allah se maango. (Sunan Tirmidhi 2516, Musnad Ahmad 2803 – Hasan)
Zinda Momineen Madadgar Hain, Murde Nahi
Qur’an sirf zinda momino ko ek dusre ka madadgar kehta hai, murdo ka zikr nahi. (Surah At-Tawbah 9:71)
Sirf Allah Se Madad Maangni Chahiye – Qur'an ke mutabiq, madad sirf Allah deta hai, koi buzurg ya wali nahi. (Surah Al-Fatiha 1:5, Surah An-Nahl 16:20-21, Surah An-Naml 27:62)
Mikael (A.S.) Ko Rizq Aur Barish Ka Kaam Mila Hai – Magar koi direct unhe nahi pukarta, toh buzurgon ko kyun?
Farishton Se Bhi Madad Nahi Maangi Jati – Agar Allah ke zinda farishton se bhi direct madad maangna jaiz nahi, toh qabron mein soye buzurg kaise madad kar sakte hain?
Abb kuch log bolegye ki nhi woh zinda hai kabron mai. Theek chalo maan lete hai woh zinda hai apni qabron mai theek hai?
Agar zinda hai toh Apni Qabar mai kya kr rahe hai?
Beshak Allah ki ibaadat kar rahe kuch aur toh nhi karegye
Ek example deta hoon. Usse gaur se padho aur samjho!
Tum Hazrat Moinuddin Chisti Rahmatullah alaihi ke waqt mai ho aisa maan lo aur woh namaz padha rahe hai. Tum peeche se jaake unke kaan mai bolte ho mere pyaare Khawaja Gareeb Nawaz Allah ki bargha mai mere liye dua kijiye mujhe yeh pareshani hai.
Yeh amaal krna kaisa rahega? Adaab ke khilaaf na? Kisi ki ibadat kharab krne ka.
Waise hi jab tum unki qabron par jaake unhe pareshan krte ho unse madad mangte ho. Toh unki ibaadat kharab nhi hoti hogi?
Kya yeh adaab ke khilaaf nhi hai? Waha khade hoke Allah se hi dua mango apne nek kaamon ke wasile se. Ya Allah ke naam ke wasile se ya.
Shirk Ka Rasta Mat Apnao – Allah ka hukm wazeh hai: Dua sirf usi se maangi jaye.
Comments
Post a Comment